【朗豪坊Legoland】免費任玩任砌 @ 旺角中的LEGO的旺角

超大型 LEGO 專門店進駐朗豪坊, SY問:「係米正版呀?」當然啦!! (一睇價錢就知好嘢嚟), 最重要:免費任玩任砌, 毋須一定要買!!

任玩區 1) Legoland一樣砌人仔

每一個人仔, 可以由「頭」、「衫」、「褲」、「帽」及「武器」5件配件組合而成, 而每款也有7個不同選擇....

(我唔識計一共可以變出幾多款人...千萬唔好問我)

SY:「有網球拍, 有大棍, E...仲有貓腦, 同狗狗...爸爸! 動物點砌呀?」應該計算就當一件配件吧! $99可砌三個人仔都算抵...(最抵! 當然好似我咁, 砌完, 影相之後又還原, 放返好~Free)

任玩區 2) DUPLO幼兒系列:

SY:「E啲係畀BB玩嘅...E!! 爸爸, 我搵到以前有人送畀我粒肥人Lego呀」(對! DUPLO 人仔真係肥D)

  

任玩區 3) 免費大砌特砌

在專門店的右手邊, 有一個任玩Lego區, 大人小朋友一樣歡迎任砌.  兩張大Lego枱上, SY大叫要砌一間屋.

店員姐姐很好人,  經常會陪小朋友齊齊砌, SY:「砌好咗啦....(店員疑問:點解你間屋一拉開門, 密卦咗嘅??)」

另外, Lego枱後亦有一幅2 X 3米的Lego牆, 可惜我被SY禁止觸踫, SY:「人哋係日曆板嚟架, 點可以整亂晒呀! 爸爸!你唔好砌啦!」(??變態少年?)

Lego牆旁邊就是小小展覽專櫃, 由Lego逹人Andy及他的團隊, 不定期牛刀小試之作.

雖然說是簡單小展品, 但Q版Boba Fett就已經好想抱住合照.

MINI COOPER車隊更加不得了, 兩部大的反而不及細的28輛吸引...最特別中間有透明特別版呀!

這部118...有理由相信應該是變型金剛是也, 好靚呀!!

Andy Hung 早年於理工一次Lego展認識, 今日不是他叫我, 我也不認得出Andy, 我:「點解你多咗咁多白頭髮嘅?」

Andy:「E啲係髮泥嚟呀!!」,我太少見多怪! 不好意思. 原來Andy團隊花了約2個月就完成了, 全場最震撼的「旺角中的Lego的旺角」(嘩! 好勁呀!)

Andy:「你可以留意返, 真實中有D大隻佬係地鐵站口派傳單, 我哋都有砌落去呀!」

小肥羊, 朗豪坊對面麻雀舖, 7-11, Sa-Sa全部有齊.

車來車往的彌敦道, 有人在屋頂畫畫, 有人捉狸貓, 仲有好似有個賊喎

我記得Andy團隊早已砌過中環, 北角, 今次更是我熟悉的旺角, 看來很快可以18區合併了.

任玩區 4) 自助Lego散件任揀任買

本來是提供給玩家在120個掛牆圓桶內, 隨意裝滿一杯積木, (小杯$119、大杯$199), 的零件之牆, 今日竟然變為小朋友最愛地帶.

SY:「爸爸! 你要邊款呀? 我幫你吖, (我:我買原盒架喎, 散件唔要喇)」

結果, 這位小朋友揀滿一杯, 又自動還原歸位, 就連店員也說:「嘩!小朋友你咁幫手嘅, 你有冇興趣放假嚟兼職呀?」(正喎! 係米真係請佢?)

我在專門店發現有LEGO人型蛋糕模（$149）, 冰模（$79）,  水杯($99), 原來Lego真的無孔不入之地啦.

在場有人說:「一定要買E盒Wall-E ($499)畀我男朋友, 好抵呀! 出面抄緊」,我本來也心大心細, 不過SY說:「Wall-E我都唔鍾意, 又唔係布甸」(仲好! 慳返)

店員一聽到我說限定版, 立刻指指大門口說:「大笨鐘($2,399), Volkswagen 甲蟲車 ($999), 波子911 GT3  ($3,299), 就係我哋舗頭限量版」(我好想買架波子呀! 不過屋企已經無位呢!)

全店最抵我覺得應該是IronMan磁石人仔, 網上最便宜也要$65, 今日只是$59.

臨走前, SY望著大大個Lego公仔說:「點解佢有兩張$100蚊?」, 我最初以為是鱷魚, 原來是銀紙, 工作人員說:「佢叫阿輝, 都係我哋員工喎」至於他為何叫阿輝? 員工:「人人都咁叫, 我都唔知喎」

SY:「佢唔係叫阿輝, 佢叫雷神, 因為佢揸住個大鎚」(咁都得??)

買Lego有著數:

即日起至 22日, 凡掃貨滿 $1888 都可以換一盒限量版 Box set.

即日起至9月31日如果買滿 $818就可以抽獎一次, 有神秘禮物一份.

即日起至8月31日, 凡購物滿 $500, (當中包括一個匙扣), 就可以免費刻名於Lego上. 

樂高認證LEGO專門店
地址：旺角朗豪坊12樓1B
營業時間：11:00-23:00
查詢：2613 2888


大仁生活facebook