老友的每月聚會, 最重要飯局不限時, 食好東西當然重要, 昨晚竟然給我與上平到「黐線」, $88任食, 任添嫩雞打邊爐.
阿太質疑我:「雞煲? 辣㗎喎, 你食到咩?」, 我答:「有4款揀, 有辣, 有唔辣吖麻」
本來, 怕辣的我最初點了清湯雞煲,
不過店員說:「你哋4個人, 可以分開兩個爐, 一個辣, 一個唔辣囉」
(係米真係唔辣㗎?) 她繼續說:「其實你叫少辣都唔會太辣,
因為師傅炒過, 惹味過清湯雞煲好多㗎,
如果辣你米自己加雞湯囉」
二人同行, 會送一碟配料, 魚蛋、雞紅、蟹柳、魚片和雞腸, 當然一定較淨食雞煲好得多. 朋友C:「送嘅魚片都幾好食喎」...重點是免費呀!
原來少辣的雞, 對我來說已經是超辣, 朋友E:「嘩!你辣到成塊面紅晒, 仲駛唔駛流咁多汗呀? 你將舊雞浸落去個邊爐度米無咁辣囉」
朋友E:「E度啲雞真係幾得喎!」不願出鏡的老闆阿添:「我哋用本港走地雞, 所以肉味, 肉質好過出面」
(點解嘉美雞, 清遠雞要$288咁貴? 又要訂?), 阿添:「嗰D叫名牌雞, 一分錢一分貨, 當然更加好食」
孤寒的我, 連本來舖滿車打芝士的$158芝士雞爐也不捨得, 更何況要$288呢? 不過, 如此巨型的芝士, 師傅也真的磨到大汗耷細汗,
辛苦晒!
阿添真夠細心, 因為問我會不會太辣, 結果, 當我們點第二煲時, 辣度減少, 炒過的雞, 嫩滑中帶少少辣, 果然好味, 正到爆.
(幾多碟就會係一隻雞?) 阿添:「4碟! 所以如果兩個人食到5碟, 我都蝕㗎, 唯有賺幾蚊啤酒, 汽水錢囉」
我們今日點了五碟雞, 及2個超惹辣雞煲, 之後每人再來兩碗雞粥, 4名麻甩佬已經飽到要捧實肚皮.
PS: 雞粥又綿又入味, 飯後清一清腸胃, 正到痺!
(你哋開幾多年?) 阿添:「上手唔做, 我啱啱先頂咗嚟做3個月, 所以先攪任食, 平啲吸引多D人嚟食麻, (我:我仲以為你開咗好多年㖭)」
(點解你可以賣咁鬼平?) 阿添:「我屋企人係深水埗賣咗幾十年雞, 所以來貨平, 咁米可以賣得平, 我本來想賣$108任食, 但反應麻麻, 於是去盡D囉」
當時, 熟食檔正在播老歌「童年」,
阿添:「聽唔聽歌? 後生仔點會聽「童年」呀! 聽我嗰D...(專業音響傳出Rolling
in the deep), 你手機嘅歌都可以畀我播, E啲先係歌麻」
林洪記
地址：長沙灣保安道325號保安道街市3樓CFS4號檔
時間：星期一至日: 18:00-03:00
電話：5171 0142
大仁生活facebook
沒有留言:
張貼留言